03Eka 2016
Sestao Berri

2008. urteaz geroztik, Sestao Berri sozietate publikoak Sestaoko Udalarenak diren 119 etxebizitzaren alokairua kudeatzen du. Gaur egun, bi etxebizitza bakarrik daude hutsik, eta alokairurako prest egongo dira zaharberritzeko lanak amaitzen direnean.

Sestaoko udal-etxebizitza gehienak Los Bañosen, Autonomían eta La Bariegan daude kokatuta. Alokairuaren batez besteko prezioa hileko 88 eurokoa da, eta maizterren erosketa-ahalmenaren arabera zehazten da errenta. Berankortasun-indizeari dagokionez, gutxieneko historikoetan dago, %0,30 ingurukoa da-eta.

Sestaoko udal-etxebizitzen parkea 28 etxebizitza berriren bidez handituko da hurrengo urtean. Txabarri kaleko etxebizitza berriak erosi egin dira dagoeneko, Arkuaren Etxean kokatutakoak eraikitzen ari dira eta 33. zein 35. zenbakietakoak aurtengo udan hasiko dira eraikitzen.

18Api 2016
10 años

Sestao Berri sozietate publikoa orain dela hamarkada bat jarri zen abian, hiria biziberritzeko eta zaharberritzeko asmoz, beheko aldea erabat hondatuta zegoen-eta. Udalerri industrialeko alde horretan, auzo ugari daude kokatuta; esate baterako, Urbinaga, Simón Drogas, Rivas, Los Baños edo Txabarri.

Sestao Berriko jarduketa adierazgarrienek honako hauxe izan dute helburu nagusi: infraetxeak desagerraraztea eta, alokairu babestuaren zein birkokapenen kudeaketaren bidez, etxebizitza duinak eskuratzeko aukera ematea. Birkokapenak, hain zuzen ere, sozietate publiko honetako lehenengo jarduketa izan ziren, Ibar Berriko eraikineko bizilagunen birkokapenak, hain zuzen ere. Hasierako ekintza hartatik igarotako hamarkadan, 191 familiaren birkokapena kudeatu du -600 laguneko taldea-, eraitsitako 36 eraikinetan banatutako 365 infraetxetan bizi ziren-eta.

Horrez gain, Sestao Berrik 466 etxebizitza berriren sustapenean ere parte hartu du, eta haietako batzuk eraikitzen ari dira oraindik, udalerriko zenbait aldetan; esate baterako, La Bariega, Txabarri, Orixe edo La Punta.

Txabarri-El Sol zaharberritzea Sestao Berriko beste jarduketa handietakoa izan da. Alde hori hiru fasetan leheneratu da, eta, bertan, zaharberrikuntza partzialak nahiz integralak egin dira, baita berreraikuntzarako jarduketak ere. Hirigintzako sozietateak jabeen 23 erkidego kudeatu eta administratu egiten ditu guztira.

Era berean, Sestao Berri bera ASAP programako (Alokairu Segurua Arrazoizko Prezioan) lehenengo eragile homologatua ere bada Etxebideren eta partikularren arteko bitartekari moduan. Bestetik, Sestao Berrik honako proiektu berritzaile hauetan ere parte hartzen duela nabarmendu beharra dago: Housgai eta Europa arloko Eu-gugle, Papirus, Trime eta NeZer, besteak beste.

Horrez gain, gizartearen eta erkidegoaren partaidetza sustatzeko eta laneratzeko proiektuak ere garatu ditu sozietateak, elkarbizitzaren eta kohesio sozialaren aldeko programen, tailerren, topaketen eta ikastaroen bidez.

05Api 2016
Txabarri 37

Ezkerraldeko udalerri honetako beheko aldeko zaharberrikuntzak aurrera jarraitzen du Txabarri-El Solen. Bertan, Sestaoko Udalak Txabarri kaleko 37. zenbakian kokatutako lau etxebizitza eta loia bat erosi ditu. Eragiketa horretan egindako inbertsioa 126.000 eurokoa izan da.

37. zenbakiko higiezinak hamar etxebizitza eta bi loia dauzka, eta, bere egitura nola dagoen kontuan hartuta, eraitsi eta berriro eraiki beharko da. Gaur egun, Sestao Berri sozietate publikoa gainerako jabeekin negoziatzen ari da, etxebizitzak eta geratzen den loia erosteko eta zaharberrikuntzarako planari jarraipena eman ahal izateko.

Gaur egun, Txabarri-El Sol Zaharberritzeko Programako lehenengo faseko obrak daude abian. Fase horretan, 25., 27., 29. eta 31. atariak zaharberrituko dira goitik behera, eta horretarako aurrekontua 3,5 milioi eurokoa izango da. Jarduketa horren bidez, 47 etxebizitza eraikiko dira. Euretatik, 33 babes ofizialeko etxebizitzak izango dira; eta gainerakoak, askeak.

Bigarren fasean, ordea, babes ofizialeko 18 etxebizitza eraikiko dira Txabarri kaleko 33. eta 35. zenbakietan; eta 9 etxebizitza aske, kale bereko 55. zenbakian. Hirugarren fasean, ostera, 37., 42. eta 57. atariak zaharberrituko dira.

18Mar 2016
Josu Bergara

10 urtek askotarako ematen dute. Nahikoa da atzera begiratzea Txabarri, Urbinaga, Simondrogas, Rivas eta Los Baños inguruetan Sestao Berrik aurrera eraman duen birsortze prozesua ikusteko. Duela urte batzuk industria jardueraz beteta zeuden kaleak, tximinien kea eta gure lantegietara zihoazen milaka pertsonak ikusten zituzten kaleak, gaur egun birgaitzea behar duten guneak dira. Gizartearen eta hirigintzaren ikuspegietatik. Eta, esango dut, baita ere, animoaren ikuspegitik ere bultzada garrantzitsua behar dugula.

Sestaoko Udalak ez du bakarrik egin erantzukizun horri dagokion bidea. Eusko Jaurlaritzaren laguntzarekin batera egin dugu, gure herriaren aldeko apustua egin duelako eta egiten jarraitzen duelako. Behar dugulako. Gure udalerriak kanpoko laguntza asko behar du, gure herriko gune hori bere garaian izan zena berreraikitzea bilatzen duten planteamendu estrategikoak behar ditu.

Sestao Berriren lana ez da eraikinen berreraikuntzara eta eraikuntzara mugatzen. Arreta berezia eskaintzen die auzokideen erkidegoekin egiten dituen gestioei, gizarte eta bizikidetza mailatan, gure herriaren behealdean. Biztanle guztiek Sestao Berrik egin duen lana ezagutzea nahiko genuke, sarri askotan lan hori ezezaguna baita. Izandako
lorpenak eta emandako pausoak irudikatu nahi dituen memoria grafiko hau prestatu dugu. Euren jarduera gizartean, auzoan eta bertako auzokideekin lanean aurrera daramaten pertsonen esfortzua ere eskertu nahi dut.

Sestaok, bere egunean Ezkerraldearen traktore ekonomiko gisa izan zenaren parte bat berreskuratzeko aukera izatea merezi du, eta gure behealdeak distira izan behar du berriro ere. Hori dela eta, Sestao Berrik askoz ere urte gehiago betetzea nahi dut. Eta hamarkada bakoitza gero eta ilusio handiagoz ospatzea, gero eta lorpen gehiago ospatuz.

Josu Bergara
Sestaoko alkatea – Sestao Berriko presidenteordea

18Mar 2016
Angel Toña

Krisi ekonomikoak, duela urte batzuetakoaren oso desberdina den errealitatea marraztu du Euskadin. Sestaok duela hamar urte baino gehiago egin behar izan zion aurre errealitate horri, udalerriko industriak behera egin zuenean, horrek eragin zuen guztiarekin; Sestao Berri izan da egindako lanaren bultzatzailea eta, pixkanaka-pixkanaka,
udalerriaren behealdea hirigintza eta gizarte alderdietatik biziberritzea lortuz joan da. Oraindik amaitu barik dagoen lana den arren, horren fruituak ikusten has gaitezke.

Eusko Jaurlaritzaren “Konpromisoa pertsonekin” claim-arekin bat etorriz, Enplegu eta Gizarte Politika Sailetik eraikinak berriztatzeko eta hiriguneak birsortzeko politika ari gara aurrera eramaten, gizarte alorrari arreta berezia eskainiz. Agertoki horrek funtsezko abiapuntua du: pertsonen duintasunaren balioa, pertsonek euren bizitza aurrera
eraman ahal izateko lekua izatea merezi dutelako.

Gizarteak baliabideen erabilera eraginkorra eskatzen du orain inoiz baino gehiago. Hori dela eta, beharrezkoa da erakundeok esku-hartze estrategiak bultzatzea merkatuetan, etxebizitza eta lurzoru alorretan. Estrategia horiek Sestao Berri sozietate publikoaren bitartez gauzatzen dira neurri handian Sestaon, duela 10 urtetik hona.

Zorionak Sestao Berri lan bikainez betetako hamar urte horiengatik!

Angel Toña
Eusko Jaurlaritzako Enplegu eta Gizarte Politika Sailburua – Sestao Berriko presidentea

14Mar 2016
Txabarri_VPO

Sestaoko hirigintza biziberritzeko prozesuak aurrera jarraitzen du, Sestao Berri sozietate publikoak sustatutako 27 etxebizitza eraikiko direlako Txabarri kalean. Etxebizitza horietatik, 18 BOEak izango dira; eta 9, libreak. Etxebizitzak 33., 35. eta 55. atarietan egongo dira kokatuta, eta Txabarri-El Sol zaharberritzeko ZIEko 2. fasearen barruan betearaziko dira.

Eraikuntza esleitzeko orduan, Sestao Berrik zenbait klausula ezarri ditu baldintzen orrian, udalerriko langabetuen artean enplegua sustatzeko eta eskaintza ekonomikoaren %25etik gorako jaitsiera ausartegiak ezesteko, sustapena bera arriskuan jarri dezakete-eta.

33. eta 35. atarietako 18 BOEak eraikitzeko obrak kontratazio publikora atera dira 1,6 milioi euroren truke (BEZik gabe), eta, aldez aurretik, Eusko Jaurlaritzako 1,4 milioi euroko dirulaguntza jaso zuten orubeen titularitatea lortzeko. Udalak 18 BOEak erosiko ditu jabetzapean, eta alokairupean lagako dizkie udalerriko gazteei.

Aurreikuspenen arabera, obrak aurten hasiko dira egiten, eta BOEak urtebeteko epean betearaziko dira; eta Txabarri 55eko etxebizitza libreak, 18 hilabeteko epean.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies