20Mar 2017

Sestaoko Udalak eta Eusko Jaurlaritzak Sestaon etxebizitza hutsen bat dutenei egin die deia, Bizigune programa kudeatzen duen Alokabideren esku jartzeko eta martxoaren 12an udalerriko Kale Nagusiko 80. zenbakiak gertatutako suteko 86 familia kaltetuak birkokatzeko.

Eraikinaren egitura egurrezkoa zenez, sutea azkar baino azkarrago hedatu zen. Hori dela eta, atari horretako 68 egoiliarrak berehala atera zituzten, baita alboko higiezineko beste hogei bat lagun gehiago ere.

Edonola ere, erretako eraikinaren behin betiko egoera zein den zehazteko asmoz udal-arkitektoak egin beharreko txosten teknikoaren zain, orain arte egindako ikuskapenen arabera badirudi eraikinaren egiturak kalte konponezinik eduki ez duela. Hori egiaztatuz gero, ez litzateke 41 etxebizitzako eraikina eraitsi beharko, nahiz eta oso zaila izango den zaharberritzea erretako eremua oso handia delako.

Alokabidek doako 900 251 251 telefonoa jarri du abian, etxebizitzak laga nahi dituzten jabeei informazioa emateko.

05Uzt 2016
visesa orubide

Ekainaren 21ean, honako bi sozietateek bat egiteko dekretua onartu zuen Eusko Jaurlaritzak: Visesa, Euskadiko Etxebizitza eta Lurzorua Sustatzeko Sozietate Publikoa, eta Orubide, Euskal Autonomia Erkidegoko bizitegi-lurzoruko operadore nagusia.

Bi sozietateek bat egiteko proiektua 2013-2016ko Etxebizitza Plan Zuzentzailean agertzen zen, eta, horri esker, baliabideak hobeto erabiltzeko, bikoiztasunak desagerrarazteko eta kudeaketa-kostuak murrizteko aukera izango du euskal administrazioak.

Eragiketa horren ondorioz, Orubide, S.A. sozietatea desegingo da inolako likidaziorik gabe, eta Visesarentzako kapitala gehituko da, bat egiteko proiektuan aurreikusitako akzioak trukatu ahal izateko.

17Eka 2016
calle Carranza

Maiatzaren erdialdean, Sestaoko Carranza kaleko 1., 2., 3. eta 4. atariak eraisten hasi ziren, infraetxebizitzak desagerrarazteko eta Ezkerraldeko udalerri honetako alde zaharra biziberritzen jarraitzeko. Eraisten ari diren lau atarietan, 32 etxebizitza zeuden, eta bertako egoiliarrak aldez aurretik birkokatu zituzten Abenduak 25 kaleko etxebizitza sozialetan.

Carranza kalea eraitsi ondoren geratuko den orubean, Sol parkearen osagaia izango den atsedenlekua atonduko da. Eusko Jaurlaritzako Etxebizitza, Enplegu eta Gizarte Politiketako Sailak egingo du eraispena, eta horretarako aurrekontua 90.000 eurokoa izango da. Aurreikuspenen arabera, obrak uztailaren amaieran bukatuko dira.

2006. urteaz geroztik, guztira 37 etxebizitza eraitsi dira Sestaoko beheko aldean, hiria bera biziberritu ahal izateko.

03Eka 2016
Sestao Berri

2008. urteaz geroztik, Sestao Berri sozietate publikoak Sestaoko Udalarenak diren 119 etxebizitzaren alokairua kudeatzen du. Gaur egun, bi etxebizitza bakarrik daude hutsik, eta alokairurako prest egongo dira zaharberritzeko lanak amaitzen direnean.

Sestaoko udal-etxebizitza gehienak Los Bañosen, Autonomían eta La Bariegan daude kokatuta. Alokairuaren batez besteko prezioa hileko 88 eurokoa da, eta maizterren erosketa-ahalmenaren arabera zehazten da errenta. Berankortasun-indizeari dagokionez, gutxieneko historikoetan dago, %0,30 ingurukoa da-eta.

Sestaoko udal-etxebizitzen parkea 28 etxebizitza berriren bidez handituko da hurrengo urtean. Txabarri kaleko etxebizitza berriak erosi egin dira dagoeneko, Arkuaren Etxean kokatutakoak eraikitzen ari dira eta 33. zein 35. zenbakietakoak aurtengo udan hasiko dira eraikitzen.

18Api 2016
10 años

Sestao Berri sozietate publikoa orain dela hamarkada bat jarri zen abian, hiria biziberritzeko eta zaharberritzeko asmoz, beheko aldea erabat hondatuta zegoen-eta. Udalerri industrialeko alde horretan, auzo ugari daude kokatuta; esate baterako, Urbinaga, Simón Drogas, Rivas, Los Baños edo Txabarri.

Sestao Berriko jarduketa adierazgarrienek honako hauxe izan dute helburu nagusi: infraetxeak desagerraraztea eta, alokairu babestuaren zein birkokapenen kudeaketaren bidez, etxebizitza duinak eskuratzeko aukera ematea. Birkokapenak, hain zuzen ere, sozietate publiko honetako lehenengo jarduketa izan ziren, Ibar Berriko eraikineko bizilagunen birkokapenak, hain zuzen ere. Hasierako ekintza hartatik igarotako hamarkadan, 191 familiaren birkokapena kudeatu du -600 laguneko taldea-, eraitsitako 36 eraikinetan banatutako 365 infraetxetan bizi ziren-eta.

Horrez gain, Sestao Berrik 466 etxebizitza berriren sustapenean ere parte hartu du, eta haietako batzuk eraikitzen ari dira oraindik, udalerriko zenbait aldetan; esate baterako, La Bariega, Txabarri, Orixe edo La Punta.

Txabarri-El Sol zaharberritzea Sestao Berriko beste jarduketa handietakoa izan da. Alde hori hiru fasetan leheneratu da, eta, bertan, zaharberrikuntza partzialak nahiz integralak egin dira, baita berreraikuntzarako jarduketak ere. Hirigintzako sozietateak jabeen 23 erkidego kudeatu eta administratu egiten ditu guztira.

Era berean, Sestao Berri bera ASAP programako (Alokairu Segurua Arrazoizko Prezioan) lehenengo eragile homologatua ere bada Etxebideren eta partikularren arteko bitartekari moduan. Bestetik, Sestao Berrik honako proiektu berritzaile hauetan ere parte hartzen duela nabarmendu beharra dago: Housgai eta Europa arloko Eu-gugle, Papirus, Trime eta NeZer, besteak beste.

Horrez gain, gizartearen eta erkidegoaren partaidetza sustatzeko eta laneratzeko proiektuak ere garatu ditu sozietateak, elkarbizitzaren eta kohesio sozialaren aldeko programen, tailerren, topaketen eta ikastaroen bidez.

05Api 2016
Txabarri 37

Ezkerraldeko udalerri honetako beheko aldeko zaharberrikuntzak aurrera jarraitzen du Txabarri-El Solen. Bertan, Sestaoko Udalak Txabarri kaleko 37. zenbakian kokatutako lau etxebizitza eta loia bat erosi ditu. Eragiketa horretan egindako inbertsioa 126.000 eurokoa izan da.

37. zenbakiko higiezinak hamar etxebizitza eta bi loia dauzka, eta, bere egitura nola dagoen kontuan hartuta, eraitsi eta berriro eraiki beharko da. Gaur egun, Sestao Berri sozietate publikoa gainerako jabeekin negoziatzen ari da, etxebizitzak eta geratzen den loia erosteko eta zaharberrikuntzarako planari jarraipena eman ahal izateko.

Gaur egun, Txabarri-El Sol Zaharberritzeko Programako lehenengo faseko obrak daude abian. Fase horretan, 25., 27., 29. eta 31. atariak zaharberrituko dira goitik behera, eta horretarako aurrekontua 3,5 milioi eurokoa izango da. Jarduketa horren bidez, 47 etxebizitza eraikiko dira. Euretatik, 33 babes ofizialeko etxebizitzak izango dira; eta gainerakoak, askeak.

Bigarren fasean, ordea, babes ofizialeko 18 etxebizitza eraikiko dira Txabarri kaleko 33. eta 35. zenbakietan; eta 9 etxebizitza aske, kale bereko 55. zenbakian. Hirugarren fasean, ostera, 37., 42. eta 57. atariak zaharberrituko dira.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies